Donderdag 23 Mei 2013

Wanneer ons met stryd en lyding moet saamleef - Deel 3

Stryd en lyding is nooit ‘n aangename saak nie. Dit veroorsaak twyfel, hartseer en ongemak. Daar is egter OORWINNING wat ons in stryd en lyding kan smaak.

Eerstens, as ons op ‘n verkeerde weg is of ‘’n verkeerde gesindheid het en God moet intree om ons reg te help en sodoende terug te bring na die Woord, dan bevestig dit volgens Heb. 12:7 God se Vaderskap en ons eie kindskap. “As julle die tugtiging verdra, behandel God julle as seuns; want watter seun is daar wat die vader nie tugtig nie?  Maar as julle sonder tugtiging is, wat almal deelagtig geword het, dan is julle onegte kinders en nie seuns nie.”

Tweedens, is dit moontlik dat ons stryd en lyding volgens Heb. 12:11-13  ook God se geregtigheid bevestig, “Nou lyk elke tugtiging of dit op die oomblik nie ‘n saak van blydskap is nie, maar van droefheid; later lewer dit egter ‘n vredevolle vrug van geregtigheid vir die wat daardeur geoefen is.” Het jy al ooit die lyding deurgaan om ‘n verkeerskaartjie te betaal? Of dalk moes jy ‘n groot hoeveelheid geld betaal om ‘n regsaak te beding wat onregverdig teen jou aanhangig gemaak is? As jy dit verduur, het jy die geregtigheid van God bevestig! Hierdie geregtigheid sal eendag in ‘n volmaakte Vrederyk seëvier. God gee jou die kans om die formasies van reg en geregtigheid nou al te smaak! Dank Hom daarvoor!

Derdens, nog ‘n oorwinning wat ons in stryd en lyding kan verkry is wanneer ons stryd en lyding ander bevoordeel. Dit kan dalk sondaars na Christus toe bring, soos Paulus in Fil. 1:12-14 verklaar: “En ek wil hê dat julle moet weet, broeders, dat wat my wedervaar het, eerder op bevordering van die evangelie uitgeloop het, sodat my boeie openbaar geword het in Christus onder die hele keiserlike lyfwag en by al die ander”. Dit kan ook volgens vers 14 ander vertroue gee, “en die meeste van die broeders wat in die Here deur my boeie vertroue gekry het, dit des te meer waag om die woord onbevrees te spreek.”

Vierdens, ‘n baie belangrike aspek van oorwinning wat in stryd en lyding moontlik gemaak kan word, is ons geestelike groei. Die apostel Jakobus, het sy gemeentelede gehelp om stryd en lyding te sien as geleenthede om te groei in hulle geloof. Hy het selfs gesê: “Ag, dit louter vreugde... as julle in allerhande versoekinge val...” Hulle blydskap moes nie wees oor die feit dat die versoeking plaasvind nie, maar oor die uitkomste wat deur die stryd en lyding daaruit sal voortkom.

Die uiteindelike uitkoms van versoekinge, stryd en lyding is Jak. 1:12 “Salig is die man wat versoeking verdra, want as hy die toets deurstaan het, sal hy die kroon van die lewe ontvang wat die Here beloof het aan die wat Hom liefhet.” Wanneer stryd en lyding in ons lewens inkom, moet ons nie daardeur ontmoedig word nie, maar die slap hande en verlamde knieë oprig, “sodat wat kreupel is, nie uit lit raak nie, maar liewer gesond word.” Alhoewel stryd en lyding nie van die begin af God se idee vir ons was nie, is dit deel van God se ingrype na die sondeval. Die omstandighede waarin stryd en lyding plaasvind is onvermydelik vir die Christen. Ons kan oorwinning hê in stryd en lyding as ons weet dat dit ‘n goddelike uiteinde het, wat nie net onsself nie, maar ook ander en ons eie geestelike groei kan bevoordeel.  

Wanneer ons met stryd en lyding moet saamleef - Deel 2

Eerstens het ons gesien dat die ONTSTAAN van alle stryd en lyding met die sondeval te doen het. Volgende gaan ons kyk na die  OMSTANDIGHEDE waarin stryd en lyding in ons lewens plaasvind. Hierdie omstandighede word breedvoerig deur die Skrif uitgelê.

Die heel eerste beskrywing van die omstandighede waarin stryd en lyding plaasvind is in Genesis 3:16-19: Moeite en smart in swangerskap, konflik tussen man en vrou oor leierskap, moeitevolle broodwinning en kosproduksie, sweet en stryd in die werksplek en die stoflike uiteinde van ons liggame.

Die tweede tipe omstandigheid wat stryd en lyding in ons lewens sal veroorsaak, is versoeking van Satan. In Matt. 6:13 leer Jesus ons om te bid en te vra “lei ons nie in versoeking nie, maar verlos ons van die Bose.” Hy sê ook in Luk. 22:40  “En toe... sê Hy vir hulle: Bid dat julle nie in versoeking kom nie.” Ons word in 1 Tim. 6:9  gewaarsku teen die versoeking van die ambisie om ryk te wil word. Versoeking, die manier hoe sonde in ons lewens inkom, kom volgens Jak. 1:13 nie van God af nie, want God versoek nie mense nie. Dink aan die stryd en lyding wat veroorsaak word as ‘n jongmens ingee vir die versoeking om dwelms te gebruik.

Die derde omstandigheid waarin stryd en lyding plaasvind is as gevolg van goddelike werking. Volgens die beloftes van God wat sê: “Ek sal jou nooit begewe en jou nooit verlaat nie.” (Heb. 13:5), sal die Here soms moet intree as dit nodig is om ons te korrigeer of reg te help. In 2 Kor. 12:7-10 se Paulus: “En dat ek my oor die voortreflikheid van die openbaringe nie sou verhef nie, is my ‘n doring in die vlees gegee, ‘n engel van die Satan, om my met die vuis te slaan, dat ek my nie sou verhef nie. Nadat God die wonderlike openbaringe van die Nuwe Testament verborgenhede van die Skrif aan Paulus gegee het, het Hy op ‘n dramatiese manier ingetree om Paulus nederig te hou. Die stryd hieroor was volgens vers 8 vir Paulus ‘n saak van ernstige gebed. “Hieroor het ek die Here drie maal gebid, dat hy van my sou wyk. En Hy het vir my gesê: My genade is vir jou genoeg, want my krag word in swakheid volbring. Baie liewer sal ek dus in my swakhede roem, sodat die krag van Christus in my kan woon. Paulus se gesindheid oor die stryd en lyding in sy lewe word in vers 10 uitgelê: “Daarom het ek behae in swakhede, in mishandelinge, in node, in vervolginge, in benoudhede, om Christus wil. Want as ek swak is, dan is ek sterk.” Soms het  ons volgens die skrywer van Hebreërs vermaning of tugtiging nodig, “...want die Here tugtig hom wat Hy liefhet, en Hy kasty elke seun wat Hy aanneem.” (Heb. 12:6-10)  Soms het ons volgens 1 Kor. 11:31-32  regstelling nodig, “Maar as ons geoordeel word, word ons deur die Here getugtig, sodat ons nie saam met die wêreld veroordeel mag word nie.”

‘n Vierde tipe omstandigheid waarin stryd en lyding moontlik sal plaasvind, is as Christene vir Christus stryd en lyding moet verduur. Praat maar met iemand wat besluit het om sendingwerk te gaan doen. Of iemand wat besluit het om hulself te laat doop en die tipe reaksie wat hulle kry. Paulus het hierdie lyding ter wille van die liggaam van Christus in Kolossense 1:24 en 2:1 beskryf. “Nou verbly ek my in my lyding vir julle ...Want ek wil hê dat julle moet weet wat ‘n groot stryd ek oor julle het...”. Christene wat al vervolg is, sal weet dat 2 Tim. 3:12-17 sê: “almal wat ook godvrugtig wil lewe in Christus Jesus, sal vervolg word.” Hulle kan vertroos word met die woorde van Petrus in 1 Pet. 2:19-24 wat sê: “Want dit is genade as iemand, ter wille van die gewete voor God, leed verdra deur onregverdig te ly.” Om oneer vir die Naam van Jesus Christus te lei was volgens Hand. 5:40-42 vir die dissipels ‘n wonderlike voorreg, “Hulle het toe van die Raad af weggegaan, bly dat hulle waardig geag was om vir sy Naam oneer te ly.”
 
Die vyfde tipe omstandigheid waarin stryd en lyding moontlik sal plaasvind, is as beproewings in ons lewens inkom wat ons geestelik laat groei. "Ag dit louter vreugde", het Jakobus verklaar, "wanneer julle in allerhande versoekinge (beproewinge) val, omdat julle weet dat die beproewing van julle geloof lydsaamheid werk..." 
 
Wanneer die omstandighede waarin jy verkeer vol stryd en lyding is, kan jy vir die Here vra om vir jou te help om te verstaan wat jy volgende moet doen. Nie net verstaan Hy waardeur jy gaan nie, maar Hy is ook die enigste Een wat waarklik kan help. 

Woensdag 22 Mei 2013

Wanneer ons met stryd en lyding moet saamleef - Deel 1

Van die oomblik van ons geboorte, tot en met ons laaste asemteug, is ons gewikkel in ‘n lewenstryd, wat met lyding, moeite en selfs die dood gepaard gaan. Ons geboorte begin ‘n lewensreis op aarde, wat altyd onder druk is en wat op ‘n dag, wat nie aan ons bekend is nie, deur die dood beëindig sal word. As gevolg hiervan leef elke een van ons met die wete dat ons vleeslik, sterwend en afhanklik is. Ons moet egter weet dat hierdie situasie nie deel van God se oorspronklike plan was nie. Sy oorspronklike bepaling in die skepping kan in Sy evaluering van die skepping in Genesis 1:31 gesien word. “Toe sien God alles wat Hy gemaak het, en—dit was baie goed. En dit was aand en dit was môre, die sesde dag.”. Alhoewel dinge nou anders lyk, sal God volgens Openbaring 21:4, dit alles eendag weer herstel. “En God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.”

Kom ons oorweeg eerstens ‘n paar godsdienstige mites oor stryd en lyding :
  • Stryd en lyding is in alle gevalle God se straf vir my sonde en ongehoorsaamheid;
  • Stryd en lyding is nie iets wat ‘n ware Christen moet verwag of toelaat nie;
  • Stryd en lyding kan deur ‘n beter geloofslewe totaal vermy word;
  • Stryd en lyding is net ‘n frustrasie wat geen waarde in my lewe het nie. Dit moet bloot verduur word totdat dit verby gaan.
Hoe ons ook al na stryd en lyding in ons lewens kyk, moet ons met die Bybel begin. In die eerste plek het ons, volgens Genesis 3:13-19 die ONTSTAAN van stryd en lyding aan die sondeval te danke. As gevolg van die ongehoorsaamheid van die mens, het God bepaal dat die sondeval ‘n meta-fisiese (geestelike) en fisiese (vleeslike) invloed op die mens se lewe sal hê. Op ‘n meta-fisiese vlak, het God soos volg bepaal, “Ek sal vyandskap stel tussen jou en die vrou, en tussen jou saad en haar saad. En Hy sal jou die kop vermorsel, en jy sal hom in die hakskeen byt.” (Gen. 3:15) Paulus sê die volgende oor ons lewenstryd, “Want hoewel ons in die vlees wandel, voer ons die stryd nie volgens die vlees nie;” (2 Kor. 10:3). Hy sê ook, “Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug.” (Ef. 6:12) As gevolg van hierdie vyandskap en stryd teen Satan, sal ons stryd en lyding verduur. Moeite, konflik, sweet en swaarkry is alles resultate van die sondeval, op ‘n fisies vlak.

Daar is tye in ons lewens, waar die stryd en lyding wat ons verduur alleenlik toegeskryf kan word aan hierdie vyandskap tussen ons en die Satan. Christene kan bemoedig word in die wete dat hierdie worstelstryd teen die duisternis, ‘n bewys is dat ons, as gevolg van die genade van God, in die koninkryk van die Lig van Jesus Christus staan.  

Voorts gaan ons kyk na die OMSTANDIGHEDE waarin stryd en lyding plaasvind.

Maandag 20 Mei 2013

Die Begin

Die begin is altyd die moeilikste, maar dit is nogtans 'n begin! Hiermee wil ek met ander deel wat ek in my studies in die Woord van God geleer het. Die titel naamlik Lewenswoord, impliseer vastigheid vir die lewe wat staat maak op die geopenbaarde woorde van God. Daarsonder kan geen mens weet wat waarheid is nie!

Eph 6:10 Eindelik, my broeders, word kragtig in die Here en in die krag van sy sterkte.